पाँच  बरस  बर  नेता बन  हरहा कस मेछरावत हे 

जेकर मुँह मा भाखा नइ हे किसिम-किसिम गोठियवत हे,
पाँच  बरस  बर   नेता   बन     हरहा  कस  मेछरावत  हे.

पद   ला   पा   के  अंते-तंते    रद्दा   मा   रेंगे   वो   मन
अपन  पूछी  ला   घेरी-बेरी   कुकुर   कस   सँहरावत हे.

बिद्वान  सही पूजत रहिथन   निचट  भकला हावन जी
सिधवा मनखे  ला वो मन  हा नाच   गजब  नचावत हे.

अगुआ  मन  के  तोनगी   घर  के  कुरसी  ला  पाये  हे
जम्मो   राजकोसी   धन   ला  धीरलगहा  पगुरावत   हे

सत्ता  के   मद   मा   जबर   बनगे   हे  अत्याचारी   रे,
लिखरी-लिखरी बात बर छाती ला गजब तनियावत हे.